\"Qaya\" Vokal Kvarteti — XX əsrin 60-70-ci illərində SSRİ-nin ən məşhur musiqi qruplarından biri. Qrupun yaradıcıları Teymur Mirzəyev, Arif Hacıyev, Rauf Babayev, Lev Yelisovetski olub. Böyük səhnəyə 1961-ci ildə gəldilər. Bəstəkar Rauf Hacıyev onları Azərbaycan Dövlət Estrada Orkestrində işləməyə dəvət edir. 1966-cı ildə Moskvada vokalçılar və qruplar arasında keçirilən ümumittifaq müsabiqənin qalibi olublar. 60-cı illərin sonu və 70-ci illər ərzində 40-dan çox ölkədə qatrol səfərlərində olmuşlar. 80-ci illərdə \"Qaya\"nın tərkibi tez-tez dəyişir. 1985-ci ildə isə \"Qaya\"nın nəzdində Caz və kamera orkestri yaradılır və \"Qaya\" estrada simfonik dövlət ansamblı adlanır. Çox keçmir, ansamblın nəzdində \"Talisman\" adlı rok-qrup da formalaşır. Ansamblda müxtəlif vaxtlarda Abbas Əhməd, Eldar Rzaquluzadə, Rüfət Babayev, Əzizə Mustafazadə, Fuad Biqbayev, Aygün Kazımova və başqaları fəaliyyət göstərirlər. Tofiq Quliyev, Fikrət Əmirov, Rauf Hacıyev, Vasif Adıgözəlov, Oqtay Zülfüqarov, Fərəc Qarayev, Əziz Əzizov, Tofiq Babayev kimi bəstəkarlarla çalışan \"Qaya\" fəaliyyətinə 88-ci ildə nöqtə qoyur.